Ibaian gora ziurrenik besterik egon arren, Artutxa baserri aurrean zegoen ibi edo pasabidea da dokumentatua dagoen lehena. Zubietatik Lasarteko Brigiden komentu ondora pasatzeko erabiltzen zen, Intxausti ingurura. Manuel Lekuona historialariaren arabera, Lasarteko dorreko jaunak inguru horretan kaia eta izokinak arrantzeko nasa izateaz gain, ibitik pasatzen ziren gurdi guztiei bide-saria edo peajea kobratzeko eskubidea zuen, erregeak emana. Aliriko zubia egin baino lehen izango zen hori, ziurrenik, Erdi Aroan, beraz.