Jatorrian bi hormetako pilotalekua izanagatik, 1936ko gerra aurretik behintzat, errebotean sarritan jokatzen zen Kaleberrin, gaur egungo frontisaren eta elizaren arteko plazan. Gerra ostean, berriz, behin bakarrik jokatu da errebote partidu bat, 1960ko hamarkadan, Iparraldeko Sara eta Zubietako taldeen artean. Hondarra bota omen zuten orduan dema-plazan, eta sakegunearen zabaleko mugak jarrarazi igeltseroari. Oraindik ere, dema-plazaren alboetan bistan dira orduko behin behineko errebote plazaren alboetako adokinezko bi marra.
Euria erruz egiten duen herria denez gurea, 1970eko hamarkadan frontoia estali behar zela adostu zuten. Ez zen, ordea, erabakia denen gustuko izan, eta asko eztabaidatu ondoren, baldintza batekin eraiki zen metalezko egitura eta uralitazko lehen estalkia: noizbait, beste nonbait pilotaleku berria egiten bazen, honi estaldura kenduko zitzaion. Betiko geratu zaio, baina, estalkia. 1997an amaitu ziren Iñaki Martinez Labiano arkitektoak diseinaturiko estalki berria ezartzeko lanak, gaur egun ikus dezakeguna, hain zuzen.
Goiko argazkian lehen pilotalekua ikus daiteke, estali gabea, 1953an. Erdikoan, lehen estalkiarekin, eta behekoan, gaur egun dagoen moduan.