Erroizpeko sakanaren goialdean dago, mendi-hegiak duen zelai batean, izen bereko parajean. Intsinis pinua landatzeko, Estatuak mintegi edo bibero propioa zuen hasiera batean. Garai hartakoak dira, beraz, eraikin hori eta zertxobait goraxeago dagoen ur-biltegia. Gerora, 1956ko otsaileko izotzaldi latza pinudiaren hondamendia izan zenez, jo eta su, pinua botatzen aritu ziren basomutilen aterpe izan zen txabola, bolada batez. Geroztik, etxegabekoak ere bizi izan ziren bertan, baina hain bizi baldintza kaskarretan ez zuten asko iraun. Hutsik eta egoera txarrean aurkitzen da gaur egun.