Baina jakin dugunez, Etumetatik haraino beste kable bat ere muntatu zuten. Bost bat urte egon ziren egurra ateratzen. Amaitutakoan, ordea, desmuntatu eta Nafarroako Errazkinera saldu zuten kablea, han Aralarko Malloetatik belarra jaisteko. Mantso-mantso jaisten ziren enborrak, freno sistema baitzuten, eta ez zituzten txirrikak kaltetzen. Baina enborraz gain, su-egurra ere jaisten zuten inguruko okindegietako labeetarako, eta sorta horiek ziztu bizian egiten zutenez jaitsiera, arazoak izaten zituzten poleekin, berotu egiten baitziren. Txirrikak, berriz gora, asto-gainean eramaten zituzten. Andoaingo Belkoaindik Bazkardora pinu enborrak kablean jaisten ikus daiteke argazkian, 1944an.